Podcast Episode Details
Back to Podcast Episodes
2 Aibreán 2022 (An Clár)
Episode 88
Nuacht Mhall. Príomhscéalta na seachtaine, léite go mall.
*
Inniu an dara lá de mhí Aibreáin. Is mise Niall Ó Cuileagáin.
Thosaigh cainteanna síochána idir an Rúis agus an Úcráin in Iostanbúl an tseachtain seo. Gheall na Rúisigh go maolódh fórsaí Rúiseacha a ngníomhartha míleata timpeall na príomhchathrach Cív agus in áiteanna eile i dtuaisceart na tíre fad is atá na cainteanna ar siúl. Tuigeann anailísithe áirithe go bhfuil na Rúisigh ag maolú a ngníomhartha míleata i gceantair nach bhfuil smacht acu a thuilleadh. Tá ionadaithe na dtíortha ag plé neodracht na hÚcráine agus an stádas a bheidh ag réigiún an Donbass. In Éirinn, d’fhógair an Taoiseach Micheál Martin go bhfuil ceathrar oifigeach in Ambasáid na Rúise le díbirt as Éirinn mar gheall ar chomhairle slándála a fuair sé.
D’fhógair an tAire Oideachais Norma Foley plean nua don Ardteistiméireacht Dé Máirt. De réir na leasuithe seo, ní bheidh i scrúduithe scríofa ach 60% den mharc iomlán agus beidh ar na múinteoirí scoile measúnuithe a dhéanamh ar dhaltaí chomh maith. Beidh dhá ábhar nua le tairiscint freisin: ‘Stáidéar Dráma, Scannán agus Amharclainne’ agus ‘Gníomhú ar son na hAeráide agus Forbairt Inbhuanaithe’. Dúirt Norma Foley go mbeidh daltaí ullmhaithe do dhúshláin an tsaoil san aonú haois is fiche de bharr na n-athruithe seo agus nach mbeidh an strus céanna orthu. Mar sin féin, seans nach mbeidh múinteoirí sásta leis na leasuithe. Rinne siad measúnuithe ar dhaltaí i rith na paindéime ach bhí sé tugtha le fios dóibh nach mbeadh sé riachtanach fós tar éis na géarchéime.
Bhí oíche lán de chonspóid ag na Gradaim Oscar Dé Domhnaigh seo caite. Nuair a bhí an fear grinn Chris Rock ag bronnadh gradam don scannán faisnéise is fearr, rinne sé magadh ar Jada Pinkett-Smith, bean chéile Will Smith. Rinne Rock comparáid idir Jada agus an carachtar maol sa scannán G.I. Jane, mar tá alóipéice uirthi. Chuaigh Will Smith i dtreo an ardáin agus thug sé buille boise san aghaidh dó. Tar éis sin, bhuaigh Smith an gradam don aisteoir fireann is fearr. An lá ina dhiaidh sin, ghabh Smith a léithscéal le Rock, agus dúirt an tAcadamh Oscar go mbeadh fiosrúchán ar an eachtra. D’fhág an eachtra an ócáid faoi smál, ócáid ina bhuaigh Coda an gradam don scannán is fearr. Chomh maith leis sin, bhuaigh Kenneth Branagh an duais don script is fearr dá scannán Belfast.
*
Léirithe ag Conradh na Gaeilge i Londain. Tá an script ar fáil i d'aip phodchraolta.
*
GLUAIS
gníomhartha míleata - military activities
comhairle slándála - security advice
leasuithe - reforms
Gníomhú ar son na hAeráide agus Forbairt Inbhuanaithe - Climate Action and Sustainable Development
fear grinn - comedian
bull boise - slap
Published on 2 years, 9 months ago