Episode Details

🎙️ Leo kwenye Neno la Leo

Leo kupitia 2 Samweli 14:1–3 tunaendelea na simulizi ya familia ya Daudi ambayo imepitia maumivu, ukatili, kisasi na sasa utengano.

Baada ya Absalomu kumuua Amnoni, anakimbia na kuishi mbali na familia yake.

Miaka inapita.

Daudi anamkumbuka mwanawe. Lakini bado hakuna mazungumzo ya kweli yanayoonekana kati yao.

Ndipo Yoabu anatambua hali ya moyo wa mfalme na kupanga njia ya kujaribu kumrudisha Absalomu.

Na hapa tunakutana na ukweli ambao wengi wetu tunaweza kuuhusisha na maisha yetu:

Muda kupita sio sawa na jeraha kupona.

Wakati mwingine migogoro inatokea ndani ya familia, ndoa, urafiki au hata kanisani.

Mtu anasema jambo linaloumiza.

Mwingine anakasirika.

Hakuna anayetaka kuanzisha mazungumzo.

Halafu tunasema:

“Acha tu, muda utaponya.”

Siku zinapita.

Miezi inapita.

Wakati mwingine hata miaka inapita.

Lakini tunapokutana tena na mtu huyo, tunagundua kwamba maumivu bado yapo.

Tulikuwa tumeacha kuzungumza kuhusu tatizo, lakini hatukuwa tumelitatua.

Na hapo ndipo tunajifunza tofauti kati ya ukimya na amani.

Watu wawili wanaweza kuacha kugombana lakini bado wasiwe wamepatana.

Familia inaweza kuendelea kukutana kwenye sherehe lakini ndani yake kukawa na majeraha ambayo hakuna anayethubutu kuyagusa.

Watu wanaweza kusalimiana vizuri huku mioyoni mwao kukiwa na uchungu wa miaka mingi.

Kwa sababu ukimya unaweza kuficha mgogoro lakini hauwezi wenyewe kuponya jeraha.

Katika Mathayo 5:23–24, Yesu anatufundisha umuhimu wa kuchukua hatua kuelekea upatanisho.

Na Warumi 12:18 inasema:

“Kama yamkini, kwa upande wenu, mkae katika amani na watu wote.”

Angalia maneno hayo:

“Kama yamkini, kwa upande wenu.”

Hapa kuna hekima kubwa.

Biblia haitufundishi kwamba tunaweza kulazimisha kila relationship irudi kama ilivyokuwa.

Wala haitufundishi kwamba upatanisho unamaanisha kupuuza madhara, kuondoa mipaka au kurudi katika mazingira yasiyo salama.

Wakati mwingine mtu amekuumiza na unahitaji kuweka mipaka.

Wakati mwingine reconciliation inahitaji ukweli kusemwa, kosa kukubaliwa, uwajibikaji na muda wa kujenga tena trust.

Na wakati mwingine, hata baada ya kufanya sehemu yako, upande mwingine unaweza usiwe tayari.

Lakini swali muhimu ni:

Je, kuna jambo ambalo nimekuwa nikilikwepa kulishughulikia kwa sababu ninaamini muda pekee utalitatua?

Huenda kuna mazungumzo ambayo umekuwa ukiyaahirisha.

Huenda kuna mtu ambaye unahitaji kumwomba msamaha.

Huenda kuna jeraha ambalo unahitaji kulizungumza na mtu salama badala ya kuendelea kulibeba peke yako.

Au huenda unahitaji kukubali kwamba relationship fulani haiwezi kurudi kama zamani lakini bado unaweza kutafuta uponyaji na amani ya moyo.

Simulizi ya Daudi na Absalomu inatukumbusha kwamba kumkumbuka mtu si sawa na kushughulikia kilichowatenganisha.

Na kutamani mambo yawe sawa si sawa na kuchukua hatua zinazohitajika kuyafanya yawe sawa.

Kwa hiyo leo, usijiulize tu:

“Ni muda gani umepita tangu tulipokosana?”

Jiulize pia:

“Je, kuna uponyaji wa kweli umetokea katika muda huo?”

Kwa sababu unaweza kuwa umeacha kuzungumzia jambo lakini bado likawa linaathiri moyo wako.

Muda unaweza kutengeneza nafasi ya uponyaji lakini hauchukui nafasi ya ukweli, uwajibikaji, mazungumzo na neema.

Kumbuka:

Kunyamaza kuhusu jeraha hakumaanishi jeraha limepona. Na muda kupita sio sawa na mgogoro kutatuliwa.

Karibu tusikilize, tutafakari na kujifunza pamoja. 🙏📖✨