Episode Details

🎙️ Leo kwenye Neno la Leo

Leo kupitia 2 Samweli 13:21–22 tunaendelea na simulizi ngumu ya familia ya Daudi.

Jana tulimwona Tamari akiwa amevunjika baada ya kile Amnoni alichomfanyia.

Leo tunaona kile kinachotokea baada ya familia kujua.

Mfalme Daudi anaposikia habari hiyo anahuzunika sana. Anakereka na kukasirika kwa kile kilichotokea.

Lakini kuna jambo ambalo simulizi linatuacha tukijiuliza:

Baada ya hasira, hatua iko wapi?

Daudi amesikia. Daudi amekasirika. Lakini simulizi halituonyeshi akichukua hatua ya kutosha kushughulikia uovu uliotokea.

Kisha tunamwona Absalomu.

Yeye pia amekasirika. Tamari ni dada yake na anajua amedhulumiwa.

Lakini Biblia inasema:

“Absalomu hakusema na Amnoni neno jema wala baya, kwa maana Absalomu alimchukia Amnoni.”

Hapo ndipo tunapoona hatari ya ukimya.

Kwa Daudi, ukimya unaonekana katika kutokuchukua hatua ya kutosha.

Kwa Absalomu, ukimya unaficha kitu kinachokua ndani yake:

Chuki.

Na hiyo inatufundisha kwamba si kila ukimya ni amani.

Wakati mwingine mtu yuko kimya lakini ndani yake kuna vita.

Anaendelea na maisha. Anaenda kazini. Anaongea na watu. Anaonekana sawa.

Lakini moyoni kuna jambo ambalo halijawahi kushughulikiwa.

Hasira yenyewe si lazima iwe dhambi. Kuna mambo mabaya ambayo yanapaswa kutukasirisha. Kile kilichotokea kwa Tamari kilikuwa kibaya na Absalomu alikuwa na sababu ya kukasirika.

Lakini swali muhimu ni:

Tunafanya nini na hasira yetu?

Waefeso 4:26–27 inasema:

“Mwe na hasira ila msitende dhambi.”

Hasira inaweza kutupeleka kutafuta haki, msaada, mazungumzo na njia sahihi ya kushughulikia jambo.

Lakini hasira inaweza pia kufichwa, kulishwa na kubadilika polepole kuwa uchungu na chuki.

Waebrania 12:15 inatuonya kuhusu mzizi wa uchungu.

Na mizizi ina tabia moja:

Huanza mahali ambapo watu hawawezi kuiona.

Hivyo ndivyo ilivyokuwa kwa Absalomu.

Kwa nje kulikuwa na ukimya.

Lakini ndani yake kulikuwa na kitu kinachokua.

Na huenda hata sisi tuna maeneo ambayo tumenyamaza lakini hatujapona.

Mtu alituumiza miaka iliyopita.

Hatusemi naye kuhusu hilo.

Hatuzungumzi na mtu yeyote kuhusu hilo.

Hatujalileta hata kwa Mungu kwa uaminifu.

Tunasema, “Niko sawa.”

Lakini kila tunapomwona mtu huyo, moyo wetu unabadilika.

Hiyo si lazima iwe healing.

Wakati mwingine huo ni uchungu uliojifunza kukaa kimya.

Na kuna upande mwingine wa ujumbe huu.

Tunapoona uovu umetendeka, hasa dhidi ya mtu asiye na nguvu, hasira peke yake haitoshi.

Kukasirishwa na injustice ni muhimu lakini pale ambapo tuna wajibu na uwezo wa kutenda, tunahitaji pia kutafuta hatua ya haki, usalama na msaada.

Kwa hiyo leo tujiulize:

Kuna ukimya gani ndani yangu unaoficha jeraha ambalo sijalishughulikia?

Usiruhusu jambo lililokuumiza jana liendelee kujenga chuki ndani yako leo.

Kwa sababu si kila ukimya ni amani. Wakati mwingine ukimya unaweza kuwa mahali ambapo uchungu unakua.

Karibu tusikilize, tutafakari na kujifunza pamoja. 🙏📖✨