Episode Details

A Asociación de Veciños de Esmelle inaugura este sábado 5 de xullo, ás 20:00 h, a exposición “Cazolitos. Memoria rural de Ferrolterra”, unha mostra que pon en valor o legado esquecido de Serafín Lorenzo —coñecido como Cazolitos—, fotógrafo afeccionado que retratou a vida cotiá da contorna de Ferrol desde mediados do século XX. Grazas ao Proxecto Esmelle, foron recuperados preto de 1.500 negativos esquecidos nun faiado, dos cales se seleccionou unha colección que poderá visitarse no Museo Pérez Porto todos os sábados de xullo e agosto, de 10:00 a 13:00 h. A exposición amosa escenas da vida no rural, oficios tradicionais, festas populares e retratos familiares, devolvendo á comunidade unha parte esencial da súa memoria colectiva. Os negativos están agora depositados no Centro Galego de Artes da Imaxe (CGAI) para garantir a súa conservación e estudo. Ademais, como xesto de recoñecemento ás persoas retratadas, calquera visitante poderá adquirir unha copia impresa das fotografías nas que recoñeza familiares, por só 1 euro. A mostra é unha homenaxe á mirada sincera de Cazolitos e ás xentes que protagonizan cada imaxe, reafirmando o compromiso da veciñanza de Esmelle coa recuperación do patrimonio cultural e visual do rural galego.