Episode Details

Fene prepárase para unha fin de semana cargada de música e boas oportunidades de compra coa celebración do Fene Rock e do Outlet do Comercio Local, dous eventos que encherán de vida o municipio entre os días 5, 6 e 7 de setembro. O Outlet Fene, organizado polo Concello en colaboración coa Asociación de Comercio, Hostalería e Servizos O Cruceiro e co apoio económico da Deputación da Coruña, converterá as rúas do municipio nun gran escaparate de ofertas. O horario será de 10.00 a 13.30 e de 17.00 a 20.00 horas o venres e sábado, e de 11.00 a 13.30 horas o domingo. Durante estes días, o público poderá atopar produtos a prezos rebaixados e gozar dun ambiente festivo cos comercios participantes: A Tenda Agasallos, Arrecendo Galego, Berline Boutique, Bualá, Cafetería CMIU Fene, Calzados Locay, Cáprica Cómics e Xogos, Costuras Mercería e Lencería, DaMa Fene, El Baúl de Bego, Jomer, Kenia Fene, Koralli Boutique, Lencería Loly Calvo, Lualé 114, Más Sport, Mayka Moda, Mi Pachu e Un Pedacito de Mí. Algúns establecementos preparan ademais promocións especiais: o CMIU Fene ofrecerá unha ración de 10 aletas de polo barbacoa con patacas a 5 euros, mentres que Arrecendo Galego organizará sorteos de cestas e vales para ceas o venres e sábado ás 21.30 horas. En paralelo, a música tamén será protagonista cunha nova edición do Fene Rock, festival que volverá converter a ría de Ferrol nun punto de encontro para os amantes do rock, completando así unha fin de semana que mestura cultura, lecer e dinamización do comercio local.