Podcast Episode Details
Back to Podcast Episodes
Sons de Nós Aritmar 29 de marzo de 2024
Durante este mes de marzo temos compartido con vós un proxecto singular de achegamento das culturas galega e portuguesa que leva en funcionamento dende o ano 2016. Trátase da iniciativa aRi[t]mar Galiza e Portugal, un proxecto da Escola Oficial de Idiomas de Santiago de Compostela, organizado polo equipo de dinamización da língua galega e os Departamentos de Galego e Portugués do Centro que naceu como un proxecto didáctico dentro das aulas. Unha proposta que naceu coa intención de que o alumnado da EOI de Compostela aprendesen galego e portugués coa motivación engadida de traballaren tamén coa música e a poesía, a rima e o ritmo. Gonzalo Constenla, director da Escola de Idiomas de Compostela e do proxecto aRi[t]mar preséntanos esta proposta pedagóxica anovadora. A experiencia, na que ao longo do ano lectivo o profesorado traballaba de forma didáctica os textos e as músicas co alumnado, moi pronto transcendeu o espazo do Centro e é, agora un proxecto compartido con outros centros de ensino, nos que, ademais de galego, se ensine (en) portugués, ou onde a música e/ou a literatura son un elemento central da oferta académica. Por se iso fose pouco, o proxecto medra de tal maneira que é quen de interesar e involucrar a un bon número de entidades de Galiza e Portugal. aRi[t]mar ten ademais un valor engadido na súa propia esencia, fai que as músicas e poesías sexan coñecidas e faino ademais despois dun proceso de votacións populares, non se trata dun xurado profesionalizado, senón de achegas realizadas polo público o que, a ollos dos protagonistas, é moi importante polo que representa. En Sons de Nós estamos moi felices de ter colaborado a espallar a través da radio o voso proxecto.
Published on 1 year, 8 months ago