Podcast Episode Details
Back to Podcast Episodes
24 Iúil 2021 (Baile Átha Cliath)
Season 1 Episode 52
Nuacht Mhall. Príomhscéalta na seachtaine, léite go mall.
*
Inniú an ceathrú lá is fiche de mhí Iúil. Is mise Liam Ó Brádaigh.
Tá rialtais údarásacha ag baint úsáid as teicneolaíocht a chruthaigh an comhlacht Iosraelach, Grúpa NSO, chun spiaireacht ar ghníomhaí ar son cearta an duine, iriseoirí, dlíodóirí agus polaiteoirí ar fud an domhain, de réir imscrúdú de chuid na meán an tseachtain seo. Dúirt an Grúpa NSO go n-úsáidtear an bogearra haiceála, ‘Pegasus’ chun súil a choinneáil ar choirpigh aitheanta agus sceimhlitheoirí. Íoslódáilte go rúnda ar fhón an íospartaigh, ceadaíonn na bogearraí rochtain iomlán ar ríomhphoist, teachtaireachtaí agus fuaim an duine. Dúirt Agnès Callamard ó Amnesty International go dtaispeánann an nochtadh seo an fíorghá le hathrú laistigh den tionscal faireachais.
Don dara bliain as a chéile, rinne Moslamaigh na hÉireann ceiliúradh ar fhéile Eid ag ocáid scartha sóisialta i bPáirc an Chrócaigh i mBaile Átha Cliath ar an gCéadaoin. D’fhreastail breis agus 300 duine chun guí ag an staid, in uimhreacha nach gceadófaí ag mosc faoi rialacha Covid. Dúirt Shaykh Umar Al-Qadri, eagraí na hócáide agus cathaoirleach Chomhairle Síochána agus Comhtháthaithe Moslamach na hÉireann, go raibh an pobal Moslamach ar fad buíoch go síoraí as ucht an deis a bheith acu páirc CLG a úsáid don tseirbhís lasmuigh. I láthair freisin, bhí ionadaithe ó roinnt reiligiún eile, san áireamh, an tArdeaspag Caitliceach Dermot Farrell, an tUrramach Michael Jackson as Eaglais na hÉireann agus an Rabbi Zalman ón bPobal Giúdach.
Tá Bille curtha chun cinn ag Teach Ionadaithe na Stát Aontaithe chun deireadh a chur le mí-úsáid chaomhnóireachta ar dhaoine leochaileacha. Ligfeadh an tAcht seo do dhuine atá faoi chaomhnóireacht a gcaomhnóir a athrú gan mí-úsáid a chruthú. Tagann an fhorbairt seo agus an feachtas “Free Britney” fós ag tarraingt aird agus tacaíochta idirnáisiúnta ar na meáin shóisialta. Rinne an t-amhránaí Britney Spears achomharc chun deireadh a chur leis an gcaomhantais a choinnigh a saol pearsanta, a hairgeadas, agus a gairm faoi smacht a hathar ó 2008.
*
Léirithe ag Conradh na Gaeilge i Londain. Tá an script ar fáil i d'aip phodchraolta.
*
GLUAIS
spiaireacht - spying
coirpigh aitheanta agus sceimhlitheoirí - recognised criminals and terrorists
Comhairle Síochána agus Comhtháthaithe Moslamach na hÉireann - Irish Muslim Peace and Integration Council
ionadaithe - representatives
caomhnóireacht - conservatorship
mí-úsáid a chruthú - to prove abuse
Published on 3 years, 5 months ago