Podcast Episode Details
Back to Podcast Episodes
5 Nollaig 2020 - TÉIC 2 (Dún na nGall)
Episode 19
Gabh ár leithscéal, seo é an leagan ceart!
*
Nuacht Mhall. Príomhscéalta na seachtaine, léite go mall.
*
Inniu an 5ú lá de mhí na Nollag. Is mise Alanna Ní Ghallachóir.
Fógraíodh an tseachtain seo go mbeidh an Ríocht Aontaithe ar an chéad áit ar domhan le húsaid vacsaín in aghaidh Covid-19 a cheadú. Is í an vacsaín ó Pfizer/BioNTech a gheobhaidh Rialtas na Ríochta Aontaithe, le 800,000 dáileog a chur isteach acu laistigh de sheachtain, a thugann díonacht suas le 95% ar an ghalar. Shocraigh Rialtas na hÉireann go gceannóidh siad 850,000 dáileog de vacsaín Moderna, agus go bhféadfadh clár an vacsaínithe a thosnú san úrbhliain.
Tháinig sneachta agus leac oighir go Tuaisceart na hÉireann i rith na seachtaine agus thit an teocht faoi bhun náid, toisc gur bhog aer Artach aneas anuas ar Éirinn agus an Ríocht Aontaithe. Cé gur ardaigh an teocht Dé hAoine, mothaíodh níos fuaire mar gheall ar ghaoth argail, le seadáin gaoithe chomh gasta le 100 ciliméadar san uair in áiteanna nochta. Bhí roinnt sneachta geallta thar na sléibhte agus na cnocanna, agus gaoth mhór le taobh chladach an iarthair.
Craoladh an t-eagrán bliantúil den Late Late Toy Show an tseachtain seo caite, le Ryan Tubridy ina láithreoir. Bhí buachaill óg darb ainm Adam, atá sé bliana d’aois, mar chuairteoir ar an seó agus é ag caint faoin dúil mhór don spás atá aige. Ba bhreá leis a bheith i gceannas ar mhisean spáis le NASA san am atá le teacht. Dúirt NASA go spreagann a dhea-chroí agus a dhea-mhianach eachtrúil iad agus go bhfuil siad ag tnúth go mór le Adam a bheith páirteach leo. Bailíodh níos mó ná €6 mhilliún do charthanais ó chraoladh an seó.
*
Léirithe ag Conradh na Gaeilge i Londain. Tá an script ar fáil i d’aip phodchraolta.
*
GLUAIS
díonacht - immunity
clár an vacsaínithe - vaccination programme
gaoth argail - bitterly cold wind
áiteanna nochta - exposed places
dea-mhianach eachtrúil - adventurous spirit
carthanais - charities
Published on 4 years ago